2Sa 6 | NdeIBE | STEP | UDavida wabuya wabuthanisa abantu bako-Israyeli abakhethiweyo, sebebonke babeyizinkulungwane ezingamatshumi amathathu.

2 Samuel 6

Ibhokisi lesivumelwano lilethwa eJerusalema

1 UDavida wabuya wabuthanisa abantu bako-Israyeli abakhethiweyo, sebebonke babeyizinkulungwane ezingamatshumi amathathu. 2 Yena labantu bakhe bonke basuka eBhala yakoJuda ukuba bayethatha ibhokisi lesivumelwano sikaNkulunkulu khonale elibizwa ngeBizo, ibizo likaJehova uSomandla, ohleziyo esihlalweni sobukhosi ephahlwe ngamakherubhi aphezu kwebhokisi lesivumelwano sikaNkulunkulu. 3 Ibhokisi lesivumelwano sikaNkulunkulu balifaka phezu kwenqola entsha balisusa endlini ka-Abhinadabi eyayiseqaqeni. U-Uza lo-Ahiyo amadodana ka-Abhinadabi, babekhokhela inqola entsha 4 eyayithwele ibhokisi lesivumelwano sikaNkulunkulu, u-Ahiyo ehamba phambi kwayo. 5 UDavida lendlu yonke ka-Israyeli benza umkhosi omkhulu wokuthokoza ngamandla abo wonke phambi kukaJehova ngokuhlabela izingoma lokutshaya amachacho, lemihubhe, lamagedla, lamasisitrumu kanye lamasimbali.

6 Kwathi sebefike esizeni sikaNakhoni, u-Uza wananabela ibhokisi lesivumelwano sikaNkulunkuluu walibamba ngoba izinkabi zazikhubeka. 7 Ulaka lukaJehova lwavutha ngo-Uza ngenxa yesenzo sakhe sokungahloniphi, ngakho uNkulunkulu wamtshaya njalo wahle wafela khonapho phansi kwebhokisi lesivumelwano sikaNkulunkulu.

8 Lapho-ke uDavida wazonda kakhulu ngenxa yolaka lukaJehova ethukuthelele u-Uza, njalo kuze kube lamhla indawo leyo ithiwa Pherezi Uza.

9 Ngalolosuku uDavida wayesesaba uJehova, wathi, “Pho ibhokisi lesivumelwano sikaNkulunkulu lingeza njani kimi?”

10 Wayengasafuni ukuthatha ibhokisi lesivumelwano sikaJehova, ukuba libe kuye eDolobheni likaDavida. Esikhundleni salokho, waliphambulela endlini ka-Obhedi-Edomi umGithi. 11 Ibhokisi lesivumelwano sikaJehova lahlala endlini ka-Obhedi-Edomi umGithi izinyanga ezintathu, uJehova wambusisa kanye lendlu yakhe yonke.

12 Inkosi uDavida watshelwa kwathiwa, “UJehova useyibusisile indlu ka-Obhedi-Edomi lakho konke alakho ngenxa yebhokisi lesivumelwano sikaNkulunkulu.” Ngakho uDavida wahamba wayathatha ibhokisi lesivumelwano sikaNkulunkulu endlini ka-Obhedi-Edomi walisa eDolobheni likaDavida ngokuthokoza. 13 Kwakusithi labo ababethwele ibhokisi lesivumelwano sikaJehova bangahamba izinyathelo eziyisithupha, anikele umhlatshelo wenkunzi lethole elinonisiweyo.

14 UDavida wayegqoke isigqoko samahlombe selineni, wagida phambi kukaJehova ngamandla akhe wonke, 15 lapho yena kanye lendlu yonke ka-Israyeli beletha ibhokisi lesivumelwano sikaJehova ngokuklabalala langokukhala kwamacilongo.

16 Kwathi lapho ibhokisi lesivumelwano sikaJehova selingena eDolobheni likaDavida, uMikhali indodakazi ka-Sawuli wayekhangele ngewindi. Kwathi ebona inkosi uDavida eseqa egida phambi kukaJehova, wameyisa enhliziyweni yakhe.

17 Baliletha ibhokisi lesivumelwano sikaJehova balibeka endaweni yalo phakathi kwethente uDavida ayelimisele lona, njalo uDavida wenza umhlatshelo weminikelo yokutshiswa leminikelo yobudlelwano phambi kukaJehova.

18 Eseqedile umhlatshelo weminikelo yokutshiswa leminikelo yobudlelwano wabusisa abantu ngebizo likaJehova uSomandla.

19 Umuntu ngamunye phakathi kwexuku lonke lako-Israyeli, abesilisa labesifazana, wamnika isinkwa, lekhekhe lezithelo kanye lekhekhe lamavini awonyisiweyo. Abantu bonke baya emizini yabo.

20 Kwathi uDavida esebuyele ekhaya ukuba abusise abendlu yakhe, uMikhali indodakazi kaSawuli waphuma wamhlangabeza, wasesithi, “Yeka ukuzibonakalisa inkosi yako-Israyeli ekwenzileyo lamhla ihlubula phambi kwezigqilikazi zezinceku zayo njengokungenziwa lilema!”

21 UDavida wathi kuMikhali, “Kade kuphambi kukaJehova. 22 Ngizakweyiseka kakhulu kulalokhu, njalo ngizathotshiswa emehlweni ami. Kodwa izigqilikazi lezi okhulume ngazo zizangihlonipha.”

23 UMikhali indodakazi saSawuli kabanga lomntwana waze wafa.